Balade 734 : Je ne voy vray phisicien (MCIX)
Autre balade
Je ne voy vray phisicien
En l’estat de la vie humaine
Qui face com li ancien
Ne qui son malade a droit maine,
5 Ne qui saigement le restraigne
Pour purgier sa grief maladie
Dont en langour de mort mendie
Longuement, ce qu’om ne doit faire 294b
Pour [lui] donner santé de vie :
10 Restraingnons le plus necessaire
Plaire veul[en]t contre leur bien
Les medicins, eschiver paine
A leurs paciens, c’est tout rien.
L’un donne syrop, l’autre sayne,
15 Leur mal nourrist qui les aplaine.
Chascun la verité leur die
De leur mal et y remedie,
Sanz eulx vouloir pour mentir plaire,
Purgent tout jusques a la lie :
20 Restraingnons le plus neccessaire
Medicin prince terrien
Figure, a garder son demaine,
Son peuple et brebis que li chien
Et loups ne leur plument la laine.
25 Un seul ne fait pas tant de paine
Comme cent. Le trop est folie
D’officiers, [dont] chascuns se lie
Pour le bestail prandre et deffaire.
Un homme oster ne souffist mie :
30 Restraingnons le plus neccessaire.
L’envoy
Princes, le bestail brait et crie
Du nombre des loups, si vous prie
Qu’en tresor ne en chambre attraire
Ne les vueilliéz, quoy qu’om vous die,
35 Car c’est sa grevance en partie :
Restaingnons le plus necessaire.
