Balade 733 : Que font prelas aux cours royaulx (MCVIII)
Autre balade
Que font prelas aux cours royaulx,
Que font les laiz aux cours d’eglise ?
Que font brebiz o les louveaulx ?
Que font maçons de terre glise ?
5 Que font potiers de pierre bise ?
Que font les doulz fourréz de paenne ?
Que fait chanoine qui ricanne
Comme uns asnes en un moustier ?
Certes, je croy que tout se dampne :
10 Chascuns fait contre son mestier.
La nature de tous oiseaulx
Garde sa fourme et sa franchise,
Car a chascun est ses niz beaux, 294a
Sanz le changier par convoitise.
15 A chascun son estat souffise :
L’agache ne veult estre canne.
L’eglise son estat prophanne
Quant lais offices veult touchier,
Des deux exercer se condempne :
20 Chascun fait contre son mestier.
Au jour d’ui dames, damoisiaulx,
Chevaliers, clers, nulz n’y advise.
Les brebis s’ostent des pourceaulx,
Et les bestes de mainte guise
25 Se separent, mais la divise
Des hommes comme faucons planne.
Mais une foiz venrront au sanne
Du grant et du hault justicier,
La passeront par sa lucanne :
30 Chascun fait contre son mester.
L’envoy
Prince, trop sont les gens nouveaulx
Plains de pechiéz et desloyaulx,
Convoiteux qui trop ont l’or chier,
Sanz raison se meslent entr’iaulx
35 Plus que chievres, moutons ne veauls :
Chascun fait contre son mestier.
