Balade 732 : A tous qui ces lettres verront (MCVII)
Balade
A tous qui ces lettres verront,
Le frequentant de court salut :
Saichent tuit qui servir y vont
Que la verité dire y put,
5 Mentir convient, cil est conclut
Qui veult trop parfont regarder.
Il fault blandir, il fault larder
Ceuls qui ont le gouvernement,
Et dire qu’ilz font saigement
10 Jusqu’a tant qu’om ara estat.
Continuer sanz partement,
Ou la[1] besongne ira de plat.
A ceuls qui pres du seigneur sont,
Servir, honourer a valut.
15 Et s’aucuns plaisans presans font,
Leur grace plus grant estre en dubt.
C’est ce qui pluseurs servens crut
Et qui les a fait demourer
En estat. Il faut aourer
20 Aucun saint pour son sauvement,
Oir, soufrir paciamment
Et qu’om ne se mette en debat.
Offices, dons querir souvent 293d
Ou sa besoingne yra de plat.
25 Encores vault au servent moult
Et a chascun d’eulx s’il se tut.
Faulx rapport maint homme y confont,
Onques jangleur a court ne plut
Longuement ne cil qui trop but
30 […]
[…][2]
Ne rumoreux communement.
Chascuns s’i doit courtoisement
Maintenir, s’estre ne veult mat,
35 Et faire son fait cautement,
Ou sa besongne yra de plat.
L’envoy
Maistres d’ostel, treshumblement
Vous supplie d’amendement
En ce dittié ou je m’esbat.
40 Corrigéz mon entendement,
Et chascuns tiengne enseignement
Ou sa besongne yra de plat.
[1] Saint Hilaire corrige en sa
[2] Vers non édités ou vers manquants non signalés
