Balade 724 : En ce doubteus pelerinaige (MXCVIII)
Autre balade
En ce doubteus pelerinaige
De ceste mortel vie humaine
A moult de peril et de raige
Et de la mort heure incertaine,
5 Traveil, desplaisir, doleur, paine
D’acquerir avoir et chevance,
Renommee avoir et puissance.
Et lors qu’on cuide estre plus hault,
Ont pluseurs mort et pestillence,
10 Car quant avoir vient et corps fault.
En jeune temps se fait oultraige
Qui maint homme a deshoneur maine.
Ou moien quiert l’un heritaige,
L’autre va en guerre soudaine,
15 L’un va par mer, l’autre par plaine,
L’autre met en fust d’une lance
Sa vie, l’un par bien s’avance,
L’autre non, car ne lui en chault.
Vivons donc tuit a souffisance 291a
20 Car quant avoir vient et corps fault.
Grant traveil ont pour vivre, sai ge,
Ainçois que leur bourse soit plaine
Ly noble homme de hault couraige
Qui Fortune en mains lieus pourmaine
25 Pour los avoir. Chascun d’eulx paine.
Les marchans ont moult de pesance,
Serviteurs de male meschance.
Or ont l’avoir, et lors leur sault
Goutes, maladie ou grevance :
30 Car quant avoir vient et corps fault.
L’envoy
Prince, il fait tresbon des s’enfance
Congnoisre Dieu, avoir plaisance
A vivre en honeur qui moult vault,
Liement, en bonne esperance,
35 Sanz trop de biens, sanz mendiance,
Car quant avoir vient et corps[1] fault.
[1] Ms. le corps
