Balade 725 : Ly homs qui a de Dieu principalment (MXCIX)
Autre balade
Ly homs qui a de Dieu principalment
Des biens mondains, son estat, sa chevance,
Par son labeur, par bon gouvernement,
Par clergie, par servir, par vaillance,
5 Par ses amis, d’ancienne puissance,
En succedant a eulx selon les drois,
Sanz offices de princes et de roys,
Et sanz leurs dons, doit Dieu bien gracier,
Car joieux vit et frans selon les loys :
10 Telz homs doit bien son Dieu remercier,
Pour les ames prier devotement
Des trespasséz, sanz mettre en oubliance
Les biens qu’om a par leur trespassement, 291b
Art ou mestier pour vivre a souffisance
15 Sanz court suir ne la desordonnance
Ou Envie grieve homme mainte fois.
La devient sers, doleureux et destrois,
Si vault de Dieu mieulx estre officier,
Car qui le sert humblement a son chois,
20 Telz homs doit bien son Dieu remercier.
Car il est hors de paine et de tourment,
De grant dangier, de mainte desplaisance,
Et n’est tenu fors a Dieu seulement
Des biens qu’il a. Autres sont en balance,
25 Creéz d’autrui, mais cilz que nulz n’avance
Et vit du sien, s’il est doulz et courtois,
Vit seurement sanz seoir en hault doys,
Et sanz paour qu’il doie trebuchier.
Qui ainsis fait, s’il est humbles et frois,
30 Telz homs doit bien son Dieu remercier.
L’envoy
Princes, li homs qui vit de pourveance
En son labour, et qui met atrempance
Sur son estat, a tousjours plain grenier.
Il regne en paix, en joie et en plaisance
Sanz estre sers. Qui a tele ordonnance,
Telz homs doit bien son Dieu remercier.
