Balade 723 : Tresdoulz amis, mais qu’il ne vous desplaise (MXCVII)
Balade
Tresdoulz amis, mais qu’il ne vous desplaise,
Des nouvelles, s’il vous plaist, [me] comptéz.
― Tresvoluntiers. Je ne voy personne aise
Et qui ne soit mas et desconfortéz :
5 Deux pappes sont de pluseurs gens portéz,
Dont il convient ou que l’un ou l’autre erre,
Et pour ce avons d’ame et de corps grant guerre.
Or se gart donc qui l’inimistié maine[1].
Car qui vourra sur ce verité querre,
10 Tout yra bien. ― Et quant ? ― L’autre sepmaine.
Homme ne voy qui envers Dieu s’appaise,
L’en vent ses biens qui estoient donnéz
Aux povres clers, du temps de saint Nycaise.
Par symonie est ly mons gouvernéz,
15 Bons clers n’ont rien, chetis sont eslevéz
Par prieres ou par don qui enferre,
D’argent ou d’or, de joyaulx ou de serre,
Princes, prelas, qu’Avarice demaine.
Mais se Raison fraint leur orgueil et terre,
20 Tout yra bien. ― Et quant ? ― L’autre sepmaine.
Nostre vie est orde, laide et punaise,
Justice fault, raisons et equitéz.
Es trois climas d’Europe, Aufrique et Ayse,
Luxure court, orgueil, toute viltéz,
25 Convoitise, toute desloyautéz,
Sanz craindre Dieu, en chemin d’enfer erre. 290d
Chascuns y va, qui bien en veult enquerre,
Dont de doleur le povre cuer me sayne.
Mais qui vouldra Dieu par pitié requerre,
30 Tout yra bien. ― Et quant ? ― L’autre sepmaine.
L’envoy
Prince, quant cil m’ot ces maulx racontéz
Et les pechiéz dont chascun est temptéz,
Esbahy fu, et pour fuir la paine,
Ly demanday se nous serions dampnéz :
35 Il dist : ― Oil, mais, ce vous repentéz,
Tout yra bien. ― Et quant ? ― L’autre sepmaine.
[1] Ms. demaine
