Balade 722 : Qui sont ceuls qui aux cours roiaulx (MXCVI)
Autre Balade
Qui sont ceuls qui aux cours roiaulx
Ont ordonnance et retenue ?
Les bons, les saiges, les loyaulx,
Pour ce est la court bien maintenue.
5 Chascun s’i ayme, retenue
N’y est, chose que l’en ne paye,
On y sert Dieu d’entente vraye,
La est Veritéz sanz mençonge,
Pitié, Charité s’i essaye…
10 J’ay menti, je croy que je songe.
Car pluseurs en y a de ciaulx
Dont chascuns d’eulx les biens mangue
D’autrui sanz paier. Telz morseaulx
Sont de cygongne et non de grue.
15 L’un fiert devant et l’autre rue
Par derrier, li uns l’autre abaye,
De la langue chascun s’i playe,
Venin s’i baille sanz esponge,
Bons n’y vient qu’on ne le delaye :
20 J’ay menti, je croy que je songe.
Il n’y a plus nulz cuideriaulx,
Ne omme de grant esternue,
Grans parleurs sur les faiz nouveaulx,
Petiz faiseurs en leur venue,
25 Ne moqueurs de la gent chanue,
Ne convoiteux qui a lui traye,
Par jangler, vaisselle et monnoye,
Terre, argent, or et, par la longe,
Cheval, harnoys, ou archegaye…
30 J’ay menti, je croy que je songe.
L’envoy
Princes, tout est jusqu’aux boyaulx 290c
Cerchié a court, or et joyaulx.
Chascuns qui puet y pince et ronge,
Escoufles, renars et louveaulx.
35 Mais mains d’eulx y lairont les peaulx…
J’ay menti, je croy que je songe.
