Balade 720 : Le droit signe de perdre seignourie (MXCIV)
Balade
Le droit signe de perdre seignourie,
Varier loy, royaume anientir,
Est quant l’en fait gouverner Menterie
Et qu’estat ont ceuls qui scevent mentir.
5 Car telz menteurs font les cuers departir
De vraie amour ou Menterie regne
Et du seigneur en delaissant son regne,
Quant il eslist pour Verité Mençongne.
Lors se destruit comme fire li Sesne :
10 Si je di voir, ne cuidiéz que je songe.
Car en telz gens n’a fors que tricherie, 288d
Qui au seigneur et au peuple sentir
Font par leur art que la terre yert perie
Quant a nul bien ne veulent assentir.
15 A tart venrront li prince a repentir
D’eulx bailler frain qui a si longue resne,
Auquel l’en deust donner trasce de chesne
En hault levé et de corde une longe,
Ou les getter dedenz le fleuve d’Esne :
20 Si je dis[1] voir, ne cuidiéz que je songe.
Par telz menteurs toute terre apovrie,
Si ne puet plus Dieux leurs pechiéz soufrir,
Qu’a leur seigneur meismes font tricherie,
Pour ce les veult nostre Seigneur pugnir,
25 Perdre le corps, la povre ame honnir.
Comme forfaiz, pis mourront que d’alesne,
Plus lapidéz seront que saint Estene,
De leurs tourmens n’aront respit n’alonge.
De leur avoir ne donrroye un seul fresne :
30 Si je di voir, ne cuidéz que je songe.
L’envoy
Princes, mentir est top grant villenie,
Et Veritéz est des loyaulx amie.
C’est de douçour et d’amisté l’esponge,
Qui fait regner les seigneurs en partie,
35 Et mentir fait des bons la departie :
Si je di voir, ne cuidéz que je songe.
[1] Saint Hilaire corrige en di
