Balade 719 : Qui ayme bien ne croit pas de legier (MXCIII)
Autre balade
Qui ayme bien ne croit pas de legier
Que son ami lui voulsist nul mal faire,
Ne qu’il vouldroit contre lui pourchacier.
Mais au jour d’uy sont maint de tel affere,
5 Et ont le cuer si lasche et si contraire
A fermeté de vray et bon amour
Qu’ilz se glacent et quierent la rumour
A ce qu’amer deussent, s’ilz fussent saige,
En diffamant leur ami. c’est folour :
10 Qui son chien het, on li met sus la raige.
Et comment puet un loial cuer cuidier
Que vray ami se voulsist contrefaire,
Qui prest ne fust pour son ami aidier ?
Puis qu’amis est, il se lairoit detraire
15 A bons chevaulx, ains qu’il voulsist retraire
De son ami [ou] blasme ou deshonour.
Mais cil qui croit pour neant tel errour
A cuer coulant, et cuide estre volaige,
Comme le sien, cuer d’ami plain d’onnour : 289c
20 Qui sont chien het, on lui met sus la raige.
Las ! quel peril de croire losangier
Sur son ami ! Cil vault pis que Macaire
Le traitreux, quant il point par derriere :
On le devroit a un gibet deffaire.
25 A toutes gens doit un menteur desplaire,
Car par son fait vient haine et tristour,
Perte d’amis, tous maulx, toute dolour.
Diable ont menteurs si fort mis en usaige
Qu’om voit par eulx [et] de nuit et de jour :
30 Qui son chien het, on lui met sus la raige.
L’envoy
Prince, bon fait le cuer avoir entier,
Sanz contre ami croire ainsis en derrier.
Du losangier eschivés le langaige
Et en tous temps tenéz vostre ami chier,
35 On ne doit pas encontre lui clochier :
Qui son chien het, on lui met sus la raige.
