Balade 718 : Qui veult perdre sens et entendement (MXCII)
Autre Balade
Qui veult perdre sens et entendement,
Oublier Dieu et vivre en grant misere,
Envie avoir, courroux, paine et tourment,
Voist ou li fils detrairoit a son pere,
5 La fille aussi y trairoit sa mere
Pour querre[1] honeur et l’avoir devant eulx,
Car en honeur veult chascuns estre seulx.
C’est au grans cours, telz sont les curiaulx.
Le demourer pour l’ame y est doubteux,
10 Qu’a grant paine sont gent de court loyaulx.
Et se bon sont en leur advenement
Et qu’ilz aient l’entente vraie et clere
Au bien commun, a bon gouvernement,
Leur voulenté change et devient amere
15 En un moment, car quant d’estat se pere
L’un d’eulx, tantost devient presumptueux,
Et lors se joint et se conseille a ceulx
Qui ont ravi terre, argent et joyaulx
Pour taire voir. C’est uns lieux perilleux,
20 Qu’a grant paine sont gent de court loyaulx.
Et je vous puis asséz monstrer comment :
Car ou li uns appelle l’autre frere,
Il le traist par derrier faintement
Et le blandist afin qu’amis appere
25 Pour decevoir, puis lui fait le cuir rere,
Car des estas sont trestouz envieux 289b
L’un sur l’autre. La n’a vray cuer piteux,
Ainçois runge tout jusques aux boyaux,
Et sans pité. Dieux nous gart de telz leux,
30 Qu’a grant paine sont gent de court loyaulx.
L’envoy
Prince, bon fait querir son sauvement
Et corrigier, comme anciennement,
Les meurs mauvais de celles et de ceaulx
35 Qui gouvernent les cours communement,
Qu’a grant paine sont gent de court loyaulx.
[1] Ms. querir
