Balade 717 : Dont viens tu ? ― De la court du roy (MXCI)
Autre balade
Dont viens tu ? ― De la court du roy, 288d
Ce dist Justice a Congnoissance.
― Es tu de l’ostel ? ― Mieux que toy.
― Donc y a tu pou de puissance,
5 Car se ne sont gens de finance
On n’y congnoist droit ne raison.
L’ostel maines par la maison,
Aux offices puéz commander,
Mais pour toy ne fait un bouon.
10 Tu deusses tout faire trembler.
― De mon acort ame n’y voy.
Folie y est, Oultrecuidance.
Envie y a la dent sur moy,
Quant servir vueil, Barat s’advance.
15 Larrecin brait, Orgueil me tance.
Se pour meffait y est prins hom,
Tantost est mis hors de prinson,
Toudis font ces maulx pardonner.
― S’en faiz tantost pugnicion :
20 Tu deusses tout faire trembler.
― Je ne puis. ― Or me dy pour quoy.
― Car tu n’es pas de m’aliance.
Fay congnoistre droiture et loy
Au souverain. Je n’ay fiance
25 Qu’en toy, car ceste demonstrance
T’appartient de ton propre nom.
De princes tout, veillent ou non,
Les mauvais, tout feray bransler,
Car en mal on ne chiet par don.
30 ― Tu deusses tout faire trambler.
L’envoy
Prince, pour faire obeissance 289a
A Dieu, devéz par atrempance
Justice et Congnoissance amer,
Droiture faire a la balance.
35 Quier pour ce faire escu et lance :
Tu deusses tout faire trambler.
