Balade 716 : Les cours de ceste vie humaine (MXC)

Autre balade

                        Les cours de ceste vie humaine
                        N’est c’un petit trespassement
                        Quant au corps qui a mort nous maine,                                            288c
                        Et je vous monstreray comment.
5                      Car puis qu’om a entendement,
                        On desire yver, puis esté,
                        Qu’il soit jour, qu’il soit avespré,
                        Pasques, Toussains, la Saint Martin,
                        Panthecouste, printemps, Noé,
10                    Ainsis va chascuns a sa fin.

                        Car la char de misere plaine,
                        Des qu’elle naist a mourir prant
                        Pour sa corrupcion mondaine,
                        Par viellesce ou par accident.
15                    Mais l’esperit perpetuent
                        Que Dieu a en corps inspiré
                        Desire qu’il soit separé
                        De la char ou trop est enclin,
                        Pour vivre en pardurableté :
20                    Ainsi va chascuns a sa fin.

                        La poursuite du corps est vaine,
                        La mort nous vient soudainement.
                        Diable, la char, le monde, paine[1]
                        De tout mener a dampnement.
25                    Passons donques devotement
                        Ce pas qui est tant redoubté,
                        Amons Dieu, faisons a son gré,
                        Prenons du ciel le hault chemin.
                        Tuit li grant roy sont trespassé :
30                    Ainsis va chascuns a sa fin.

[1] Ms. ne paine