Balade 715 : Nulz ne pense au bien souverain (MLXXXIX)
Autre Balade
Nulz ne pense au bien souverain
N’a la joye perpetuele,
N’au tourment de l’ame soudain
Qui advient par euvre mortele
5 De pechié, par mort naturele
Du corps corrumpu corrompable,
Que char et monde est decevable
Et qui trespasse en un moment,
Ces deux le temptent et le diable : 288b
10 Pensons de nostre sauvement.
Car nos avons juge certain
Et nostre cause est criminele.
En nous sont tuit pechié villain,
La poursuite continuele
15 De faire mal, vie cruele,
Haultaine, envieuse et dampnable,
Larrecineuse et convoitable
Maine chascun communement
Sanz craindre Dieu. Soyons estable,
20 Pensons de nostre sauvement.
Les signes nous monstrent a plain
Du ciel et de la terre, quele
Mutacion vient par la main
De Dieu pour nostre corruptele.
25 Veue ne fut vengence tele,
Car guerre, mort, faulte nuisable
De tous biens et fin perissable
De ce monde verrons briefment
S’a Dieu ne sommes racordable.
30 Pensons de nostre sauvement.
L’envoy
Princes, laissons l’estat muable
Du monde. A la fin pardurable
Advisons bien et saigement.
Faisons toute euvre charitable,
35 Doubtons le juge[1] espouentable.
Pensons de nostre sauvement.
[1] Ms. haut juge
