Balade 714 : Ly airs, ly temps, ly ans, ly .xii. moys (MLXXXVIII)
Balade
Ly airs, ly temps, ly ans, ly .xii. moys,
Arbres, les prez et les .iiii. saisons,
Les mons, les vaulx, les terres et les bois,
Gens et bestiaulx, les oyseauls et poissons,
5 Les semences, les vignes, les moissons,
Tout ce qui est au dessoubz de la lune
Change et se muet par diverse fortune,
En delaissant son propre mouvement.
Dont chascun dit, et aussi fait chascune :
10 Tout se destruit et ne scet on comment.
Ly airs est chaulz quant il deust estre froys,
Et la froideur pour la chalour avons,
Les jours sont cours et longs aucune fois,
Et autrement que veu ne les avons. 288a
15 Aprés chetif, es prez n’a que chardons,
Et des saisons nesemble l’autre l’une.
Gens sont petiz, mauvais, plains de rancune,
Bestaulx, oysiaulx, de povre fondement
Poissons menuz, semence maigre et une :
20 Tout [se destruit et ne scet on comment.]
Vignes valent petit et leur explois,
N’elles n’ont pas profitables boissons.
Les blez qu’on queult s’empirent soubz les toys
Ou en la grange, et pou en requeillons.
25 Pour amasser chevance traveillons.
Convoitise est entre nous trop commune,
Despitéz est qui grant avoir n’aune,
Monter voulons jusques au firmament,
Sanz foy garder a aucun n’a aucune :
30 Tout se destruit et ne scet [on] comment.
L’envoy
Princes, certes les maulx que nous faisons
Font minuer les biens dont nous parlons
Pour nous pugnir, et c’est droit jugement,
A bien faire desormais entendons,
35 De nostre cuer amons Dieu et servons :
Tout se destruit et ne scet on comment.
