Balade 713 : Sur trois pilliers ay fondé une tour (MLXXXVI)
Balade
Sur trois pilliers ay fondé une tour
De matere si fort et si durable,
Ronde dehors, et de si grant haultour
Qu’elle est sanz fin, qui vouldra perdurable,
5 Ne homs mortelz que par l’engin du diable
Ne la pourroit rompre ne trebuchier,
Ne diable encor ne la puet approuchier
Se la garde du lieu ne s’i consent :
Donc doit chascun celle tour avoir chier,
10 Qui ces pilliers et leur nature sent.
L’un est fondé d’amer son creatour,
Et le second de justice tenable,
Le tiers qu’on ait de ses subgiéz l’amour,
En eulx gardant la voie raisonnable. 287b
15 Sur ces pilliers fut ceste tour estable
Par treslong temps, or la voy eslochier.
― Pour quoy ? ― Pour ce que j’ay veu clochier
Le chastellain et contre l’innocent,
Dont pitié doit le cuer approucher
20 Qui ces pilliers et leur nature sent.
Quant on les voit changer en deshonour,
Dieu non doubter, Justice estre muable,
Que la brebis se pert par le pastour,
Qu’om eslieve le pecheur decevable,
25 Qu’om het le bon, qu’om nuist au veritable,
Et qu’om ne veult fors que l’or acrochier,
Cela des lors fist la tour desrochier,
Fendre et fremir, qui par ce se desment,
Que chascuns dust des princes redrecier,
30 Qui ces pilliers et leur nature sent.
L’envoy
Princes, penséz et de nuit et de jour
Aux trois pilliers, lesquelz vostre anceseur[1]
Garderent bien, Charlemaine et Rolant,
Ou autrement tout cherra en destour :
35 Dont tout homme doit avoir grant dolour
Qui ces pilliers et leur nature sent.
[1] Saint Hilaire corrige en ancesour
