Balade 712 : Les aveugles que fonda saint Loys (MLXXXV)
Balade
Les aveugles que fonda saint Loys,
Qui .xv. vins sont en une maison,
Voient du cuer, des oeulx sont esbloys.
D’eulx pourchacier ont maniere et raison
5 Sanz vir des oeulx, et en toute saison
Quierent par sens ce qui mestier leur est,
D’executer leur bon advis sont prest,
Et si ne vont quelque part fors en doubte.
Bien font leurs faiz. Or regardéz que c’est :
10 Maint ont grans oeulx et si ne voient goute !
Car au conseil, mais qu’ilz soient oys,
Scevent monstrer tout ce qui seroit bon,
Mais il convient, comme dist la souris,
Vir qui pandra la cloquette au mynon.
15 C’est trop bien dit, pour quoy ne le fait on ?
Pour ce que foulz de parole s’apest.
Sentence est rien sanz mettre a fin l’arrest.
Que vault conseil qui avant ne le boute ?
Tout ne vault rien puis qu’executéz n’est :
20 Maint ont granz oeulx et si n’en voient goute !
Considerans et voyans les perilz, 287a
Le feu ardant auprés de leur maison
Sanz resister, de negligence esprins,
D’executer ne sera jamais hom
25 Embesongniéz. Nous nous entroublion
Et un autre de noz robes se vest
Qui, diligens, par force nous devest
Executans son fait a pou de route,
Sanz long conseil, dont ce mot me desplaist :
30 Maint ont grans oeulx et si n’en voient goute !
L’envoy
Prince, soiéz a veoir ententis,
Brief en conseil, executans toudis
Ce qui est bon, car tel chose reboute
L’emprinse et mal de pluseurs ennemis.
35 Ouvrons nos oeulx, que ne soions laidis :
Maint ont grans oeulx et si n’en voient goute !
