Balade 711 : Mieulx vault mangier du potaige et des chos (MLXXXI)
Balade
Mieulx vault mangier du potaige et des chos,
Estre vestu d’un gros drap de villaige,
En labourant soy tenir ront et clos,
Sur son bestail vivre de labouraige
5 Moiennement, en son petit mesnaige,
Franc de son corps en seurté et [en] pes,
Qu’estre en paour en un riche palés
Et monter hault pour descendre trop bas.
Car es hauls lieux sont les vens trop mauvés.
10 Perilleus sont par tout les grans estas.
― Pour quoy ? ― Pour ce que pou a de repos
En telz estas, car homme n’est si saige
Qu’il ne faille[1] soufrir de divers mos.
Tant face bien, on lui met sus la raige,
15 Et se l’en voit qu’il soit riche a oultraige,
Envie aqueurt. On dit qu’il s’est meffés
Vers le seigneur, en une heure est deffés,
De son honeur vituperéz et mas.
Aient advis a ces poins clers et les.
20 Perilleux sont ar tout les grans estas.
Car .lx. ans regner, a mon propos,
En hault degré tant le cuer n’assouaige
Com le cheoir tourmente cuer et dos,
En un moment, en bas du hault estaige.
25 Homs de labour vit d’eufs et de frommaige,
S’il prant en gré, autre estat n’ait jamés.
Enviéz n’est, couru sus ne detrés,
Commes les grans, joieus vit sanz debas.
Saiges sont ceuls de telz perilz retrés.
30 Perilleus sont par tout les grans estas. 286c
L’envoy
Prince, bon fait vers Dieu estre devos,
Vivre du sien avoir du peuple los
Pour eschiver pluseurs perilleux cas
Qui adviennent a pluseurs comme fois,
35 Pour les estas de viandes, de[2] rosts :
Perilleus sont par tout les grans estas.
[1] Ms. lui faille
[2] Ms. et de
