Balade 710 : A une grant court tresnotable (MLXXX)
Autre balade
A une grant court tresnotable
Alay pour vir seoir les gens
Dont maint se mistrent a la table, 286a
Les uns lourdes, les autres gens.
5 Mais la fut uns petiz sergens
Qui aises sist sur basse selle.
Or ne lui souffisoit pas celle,
Une autre mist sus, qu’il va querre.
Mais il chut, en cheant sur elle :
10 De deux celles le cul a terre.
A maint fut ce fait agreable,
Chascun s’en rit. La ot venans
Qui pour ceste chose muable
Sont les .ii. celles agrapans.
15 Sus se sirent. ― Las ! moy repans,
Dist cilz qui chut, caille ay prins belle,
Bien deçus suy par ma cautelle.
Qui bien est, s’il se muet, il erre.
Cheus suy, par folie nouvelle,
20 De deux celles le cul a terre.
Cest exemple est bien recitable
En moral pour pluseurs servans
Qui ont office proufitable
Et qui sont autres convoitans,
25 Puis sont l’un et l’autre perdans.
Au petit ru boit teurterelle
Plus aise qu’en riviere isnelle
Son[1] nif en lieu moien enserre.
Cheoir ne veult, par hault voul d’aelle,
30 De deux celles le cul a terre.
L’envoy
Prince, estre doit chascuns contens
De son estat selon son sens,
Il ne fait pas bon trop acquerre
Ne vouloir monter es haulz rens
35 Dont cheent les plus acquerans 286b
De deux celles le cul a terre.
[1] Ms. Lun
