Balade 709 : Uns preudoms fut en un villaige (MLXXIX)
Autre balade
Uns preudoms fut en un villaige
Qui devoit donner a disner
A un homme de son linaige.
Si ot fait feves atourner
5 Au lart, mais quant il fist drecier,
Les feves trouva seulement
Sanz le lart. Lors dist a sa gent :
― Je feray de vous grant essart !
L’un respont : ― Faictes autrement.
10 Saichiéz qui a mangié le lart ! 285d
― Certes, voirement le sçaray je.
Vous me vouléz deshonourer,
Qui ostéz le gras du potaige,
De quoy je me doy gouverner.
15 Ailleurs m’avéz peu desrober
En blef, en vin. On donne, on vent.
Je vois trop bien appercevant
Que j’ay perdu, mais c’est trop tart :
Et si m’avéz tuit fait serment !
20 Saichiéz qui a mangié le lart
― Maistre, dist l’un, vous estes saige :
Sur chascun devéz regarder.
La cresse de char par usaige
En chaleur ne se puet celer.
25 Lors regarda, si vit fumer
Le sain de l’un. Adonc le prant,
De sa mauvestié le reprant,
Au juge l’envoya a part
Pour faire justice, en disant :
30 ― Saichiéz qui a mangié le lart !
L’envoy
Prince, maint sont mal gouvernant
Sur finances d’or et d’argent
Qui en prannent plus que leur part.
La gresse a leur bouche leur part.
35 S’acquestent et vont maisonnant :
Saichiéz qui a mangié le lart !
