Balade 706 : Preschier de Dieu ne les vices blasmer (MLXXV)
Autre Balade
Preschier de Dieu ne les vices blasmer,
Monstrer les maulx qui puelent advenir
Par le default de le craindre et amer,
Pour exemples dont il puist souvenir,
5 Lesquelz l’en voit de jour en jour venir,
Ne se veult nulz de ses pechiéz refraindre,
Ne l’ire Dieu ne sa vengence craindre,
Mais va chascun en mal perseverant,
De pis en pis, contre loy et sanz faindre,
10 Dont grant doleur vendra prouchainement.
Car l’en ne veult aux vertus encliner,
Garder la loy n’a raison obeir,
Fors a orgueil, et soy desordonner
A maugrier, parjurer et trahir,
15 Contens mouvoir et l’un l’autre hoir,
Mauvais lever, les prodommes estaindre,
Trop convoitier et charité restraindre,
Pechié de char faire publiquement,
Soy en tous maulx et ordures empaindre,
20 Dont grant doleur vendra prouchainement.
Si feroit bon de sa vie amender,
Faire le bien et du mal abstenir
Tant qu’om peust soy a Dieu racorder.
Foulz ne doubte jusqu’il se voit ferir,
25 Ne pas ne croy que nul cuide mourir,
Mais si fera. Mais paour me fait taindre.
Telz fist le grant qui puis devint le maindre. 284c
Ayons paour du divin jugement.
Le monde voy de tous pechiéz ensaindre,
30 Dont grant doleur vendra prouchainement.
L’envoy
Princes, vueilliéz a ces poins regarder,
Honourer Dieu et l’Eglise garder,
Et un chascun face semblablement,
Prandre vertus, les vices rebouter,
35 Ou nous arons jugement trop amer
Dont grant dolour vendra prouchainement.
