Balade 705 : Charité, Pité, Misericorde (MLXXIV)

Autre Balade

                        [O] Charité, Pité, Misericorde,
                        Amour de Dieu, aléz au parlement,
                        Montréz au roys qu’ilz ne croient Discorde
                        Qui a voulu guerre trop longuement
5                      Pour terre avoir, qu’om pert en un moment.
                        Faittes oster du conseil Convoitise
                        Qui a honni tout anciennement :
                        Reforméz paix au monde et en l’Eglise.

                        Dittes leur bien ce que Dieux d’eulx recorde
10                    Pour leurs pechiéz, et du peuple ensement,
                        Et pour l’orgueil, la vie laide et orde
                        Que chascun veult mener generalment
                        Sanz craindre Dieu, la paine et le tourment
                        Qui vient sur eulx, mais nul ne s’i advise :
15                    Pour eschiver d’iceulx le dampnement,
                        Reforméz paix au monde et en l’Eglise.

                        Ou autrement loy divine s’acorde
                        Que Vengence vendra soudainement
                        A tout son arc, son espee et sa corde,
20                    Qui des pecheurs fera le vengement,
                        En un conflict, si merveilleusement
                        Que du monde yert la pugnicion prinse.
                        Pour ces dames vous pri piteusement :
                        Reforméz paix au monde en en l’Eglise.

                        L’envoy

25                    Prince mondain, qu’avéz gouvernement[1],                                        284b
                        Terres, pays, royaumes, tenement,
                        La grace Dieu en ce cas vous souffise :
                        Ne queréz plus le desheritement
                        L’un sur l’autre, mais, pour vosauvement,
30                    Reforméz paix au monde et en l’Eglise.

[1] Ms. le gouvernement