Balade 704 : Je voy Vengence a tout s’espee (MLXXIII)
Balade
Je voy Vengence a tout s’espee
Et Fortune qui fait muer
Maint royaume et mainte contree
Par trop es maulx perseverer,
5 Pugnir, destruire et tourmenter
L’un en l’autre, par cas soudain.
Li Troyen et li Rommain
Furent par leur orgueil destruit,
Babilonien, li Commain :
10 Or y pensons toutes et tuit.
Vertu est reposte et celee,
Amour n’a lieu pour demourer,
Verité fault, Justice vee
A Raison loy executer,
15 Nulz ne veult Honour hosteler.
Charité muert, dont je me plain.
Qui regnent ? Tuit vice villain,
Car tous grans pecheurs sont en bruit.
L’espee de Vengence craim :
20 Or y pensons toutes et tuit.
La terre est pour ce advironnee
En l’air, en l’eaue et en la mer,
D’ennemis qui font la meslee
Pour les granz pecheurs assembler.
25 Perseverans par guerre oultrer
Les ferra Dieux, et de leur main
S’entreturront a jour certain
Pour leur pechié qui trop les nuit
Si tost comme d’ui a demain :
30 Or y pensons toutes et tuit.
L’envoy
Prince, la loy Dieu n’est doubtee. 284a
No foy est en deux divisee,
Maulx regnent de jour et de nuit.
Comment nous seroit paix donnee ?
35 Sur nous vient la dure journee :
Or y pensons toutes et tuit.
