Balade 703 : Adam, Noé, Abraham et Davit (MLXXII)
Balade morale
Adam, Noé, Abraham et Davit
Et en aprés la transmigracion,
L’advenement du fils Dieu, Jhesu Crist,
Le temps des ans de s’incarnacion
5 Jusques a cy, et la mutacion 283c
Qui a esté en quatorze cens ans,
Entre un chascun de ces aages coulans,
Nous monstrent bien par vraie experience
Que nous sommes de la fin approuchans,
10 Et si n’est nul qui en ait congnoissance.
Par Levitique nous est encore descript,
Pour noz pechiéz, no grant destruction,
Quant nous ferons contre loy et l’edict
De Dieu qui fist nostre creacion,
15 Et si avons l’adnonciacion
Aux pastouriaulx, d’angels a eulx parlans,
Gloire au treshault et aux hommes donnans
Paix en terre, par tele convenance
Que volunté eussent bonne. Ainsi prans,
20 Et si n’est nul qui en ait congnoissance.
Joignons ces poins et ce qui en est dit,
Si trouverons, selon m’entencion,
Consideré que tuit font contredit
A la loy Dieu, que variacion
25 Du cours du monde et renovacion
Se fera brief, car cilz aages dolans
Est en pechié et mal perseverans,
Qu’en bon vouloir n’a homme sa plaisance,
Dont paix avoir nous est Dieux deveans,
30 Et si n’est nul qui en ait congnoissance.
L’envoy
Prince, chascun quiert singulier profit
Et le commun a chascun en despit,
En convoitant terres, or et finance,
Qui destruisent le corps et l’esperit
35 Dont au jour d’ui voit on que tout perit,
Et si n’est nul qui en ait congnoissance. 283d
