Balade 702 : Apprenéz moy comment j’aray estat (MLXX)

Balade

                        Apprenéz moy comment j’aray estat
                        Soudainement, dame, je vous en prie.
                        Et en quel lieu je trouveray bon plat
                        Pour gourmander et mener glote vie.
5                      ― Je le t’octroy. Traison et envie
                        Te fault sçavoir, ceuls te mettront avant.
                        Mentir, flater, parler de lecherie :
                        Va a la court, et en use souvent.

                        Pigne toy bel, ton chaperon abat,
10                    Soies vestus de robe tresjolie,
                        Fourre toy bien, quoy qu’il soit de l’achat,
                        Tien toy brodé d’or et de pierrerie,
                        Ment largement afin qu chascuns rie,
                        Promet asséz et tien po de convent.
15                    Fay tous ces poins, ne te chaille qu’om die :
                        Va a la court et en use souvent.

                        A maint l’ay veu faire qui s’i embat,
                        Soy acointier de l’eschançonnerie,
                        Jouer aux dez tant qu’il gaingne ou soit mat.
20                    Qu’il jure fort, qu’il maugrie et regnie,
                        Et lors sera de la droitte mesgnie.
                        Fay donc ainsis, met toy tousjours devant,
                        Pour avoir nom, tous ces vices n’oublie :
                        Va a la court et en use souvent.

                        L’envoy

25                    Princes, bien doy remercier Folie                                                      282d
                        Qui m’a aprins ce beau gouvernement
                        Et qui m’a dit : ― A ces poins estudie,
                        Va a la court et en use souvent.