Balade 701 : Donnéz au povre qui ne voit (MLXIX)

Autre balade

                        Donnéz au povre qui ne voit,
                        Au muyau qui ne puet parler,
                        Donnéz au sourt qui goute n’oit,
                        Qui ne puet riens fors demander.
5                      Son mestier est de truander.
                        Est il homme qui bien lui face ?
                        Lors lui respont uns qui oit cler :
                        ― Nostre Sire t’a fait grant grace !

                        Tu as .iii. poins que chascuns doit
10                    Avoir, qui veult le sien garder :
                        Dieux en ce monde te pourvoit.
                        Mauvés mot n’y puéz escouter,
                        Mal veoir ne riens rapporter
                        Dont ta chevance se defface,
15                    Ne tu n’y doiz riens convoiter :
                        Nostre Sire t’a fait grant grace.

                        Car maint par veoir se deçoipt,
                        Par oir se puet homs troubler,
                        Et en parlant de qui que soit
20                    Se puet destruire et affoler,
                        Perdre corps, chevance laissier.
                        Dieux ces trois poins en toy efface,
                        Gracy loy, va t’en hosteler.
                        Nostre Sire t’a fait grant grace !                                                         282c

                        L’envoy

25                    Prince, ainsi me voult refuser
                        Sanz vouloir que plus demandasse
                        Cilz qui dist pour moy conforter :
                        ― Nostre Sire t’a fait grant grace !