Balade 698 : Homme ne puis chascun jour encontrer (MLXVI)

Balade

                        Homme ne puis chascun jour encontrer
                        Qui ne die : ― Scés tu riens de nouvel ?
                        Je di que non, et le puis bien prouver,
                        Car je ne voy bien, soulas, ne revel,
5                      Joie, deduit, ne riens qui me soit bel,
                        Largesce, honeur, bonne vertu qui soit
                        Dont l’en feist la pierre d’un annel :
                        Le temps toudis m’est tel comme il souloit.

                        Je ne le voy onques jour admender,
10                    Mais voy Regnart toudis dedenz sa pel,
                        Je voy les loups les brebis estrangler,
                        Et les grans chiens envieux sanz rappel
                        Qui o les loups assaillent leur tropel.
                        La layne fault de quoy l’en se vestoit.
15                    Pour escorchier voy tout prest le coutel :
                        Le temps toudis m’est tel comme il souloit.                                    281d

                        Onques ne vi grant justice regner,
                        Mais j’ay veu, et par dessus la pel
                        Du povre homme, pluseurs gens atempter,
20                    Au foible oster par le fort son morsel.
                        L’un courre sus, ainsi comme un pourcel,
                        Et le tuer si tost qu’il en parloit.
                        Les vices voy par tout a plain tonnel :
                        Le temps toudis m’est telz[1] comme il souloit.

                        L’envoy

25                    Beaus doulz seigneurs, or me lessiéz ester,
                        N’enqueréz plus, chascuns tous ces pins voit,
                        Car quant a moy, sanz trop plus declarrer :
                        Le temps toudis m’est telz[2] comme il souloit.

[1] Saint Hilaire corrige en tel

[2] Saint Hilaire corrige en tel