Balade 697 : Donnéz au povre langoreux (MLXV)

Autre balade

                        Donnéz au povre langoreux
                        Une aulne de [vo] doulz octroy
                        En l’onneur du dieu amoureux,
                        Humble dame, regardéz moy
5                      En pité, car d’amours marvoy.
                        J’ay pour li mainte angoisse traitte.
                        ― Certes, amis, je n’ay de quoy :
                        Aléz a Dieu, l’aumosne est faicte.

                        ― Helas ! dame, je suis tous seulx,
10                    Tourmentéz si qu’a paine voy.
                        Donnéz moy un regart ou deux
                        De voz doulz oeulx, car bien perçoy
                        Que la grant faim et la grant soy
                        Que j’ay d’amours sera retraitte.
15                    ― Fuiéz, trop me chargiéz d’annoy,                                                     281c
                        Aléz a Dieu, l’aumosne est faicte.

                        ― Chetis, las ! Aléz cuer piteux,
                        Au moins me touchiéz de vo doy,
                        Si en seray moins dolereux.
20                    Povres en l’amoureuse loy
                        N’en ponrroit moins querre, ce croy.
                        ― Vous dittes voir, cuer qui s’endebte
                        Doit paier, ailleurs m’amour doy :
                        Aléz a Dieu, l’aumosne est faicte.

                        L’envoy

25                    ― Hé ! Dieu d’Amours, d’amer recroy,
                        Quant Charité voy si deffaitte
                        Que chascun dit endroit soy :
                        ― Aléz a Dieu, l’aumosne est faicte.