Balade 696 : Trop m’est changiéz li temps et la maniere (MLXIV)

Autre balade

                        Trop m’est changiéz li temps et la maniere
                        Depuis le jour que je me departi
                        De vo douçour, tresdouce dame chiere,
                        Car onques puis je n’os joyeux parti.
5                      Pour mon depart ainçois suy departi
                        De griefs pensees et de divers dolours.
                        Las ! bonne amour, je muir, mais c’est party
                        Que mon cuer noye en larmes et en plours.

                        Car chascun jour suis en une riviere
10                    Ou onques homs tel doleur ne senti
                        Comme je fais, car l’eaue en est trop fiere.
                        La m’y plungent my mortel ennemi,
                        Dangier, Refus, Desespoir, Paour si
                        Que noier craing, ne je n’ay nul secours :
15                    Or aiéz donc, dame, pitié[1] de mi,                                                       281b
                        Que mon cuer noye en larmes et en plours.

                        Ne m’oubliéz, si de vous suy arriere,
                        Car le depart est contre moy parti,
                        Honeur l’a fait, je vois soubz sa banniere,
20                    Et vous estes si acointes de lui
                        Que vous devéz advouer vostre ami,
                        Moi, qui le sers sanz laissier voz amours :
                        S’autrement va, en languissant vous di
                        Que mon cuer noye en larmes et en plours.

                        L’envoy

25                    Tresdouce dame, aiéz de moy merci,
                        Car vous estes ma joie et mes recours.
                        Souviengne vous de quel mal je langui,
                        Que mon cuer noye en larmes et en plours.

[1] Ms. de pitie