Balade 695 : Vint ans a que je ne cessay (MLXIII)

Autre balade

                        Vint ans a que je ne cessay
                        Des vices blasmer et d’escripre
                        Les vertus, mais je m’en tairay
                        Car tousjours devient chascun pire.
5                      Aléz tuit du regne en l’empire
                        S’autrement faire ne vouléz,
                        Vous feréz bien le diable rire :
                        Faittes du pis que vous pouéz.

                        Desormais me deporteray
10                    De plus estudier ne lire,
                        Et voz euvres regarderay,
                        L’avarice, l’orgueil et l’ire,
                        La traison et le martire
                        Que l’un a l’autre pourchacer.                                                            281a
15                    Toléz, batéz, plus n’en puis dire :
                        Faittes du pis que vous pouéz.

                        Perseveréz, puis que je sçay
                        Qu’autrement ne vous veult souffire,
                        Mettéz tout le monde en esmay
20                    Vueilléz tout honnour contredire
                        Si que la fin se puist eslire
                        De ce monde, que vous queréz
                        Pour enfer, ou un chascun tire :
                        Faittes du pis que vous pouéz.

                        L’envoy

25                    Prince, plus ne vueil contredire
                        Aux gens mondains leurs voluntéz,
                        Mais pour plus avoir de martire
                        Faittes du pis que vous pouéz.