Balade 694 : Qui me sçaroit des ars mondains apprendre (MLXII)
Balade
Qui me sçaroit des ars mondains apprendre
Li quieulx vault mieulx, ou science ou labours,
Estre seigneur et le peuple deffendre,
Juge, maçon, muyaus, aveulge[1] ou sours,
5 Ou grant amasseur d’argent,
Ou dire voir des vices de la gent,
Ou de mentir pour sa besoingne faire,
Si m’en die, pour Dieu, ce qu’il en sent.
― Ment donc toudis et le voir vueilles taire.
10 A labourer ne te chaille d’entendre.
Estre seigneur au monde est grans honours
Quant le labeur puet de ses subgiéz prendre,
Mais le peril de la deffense est lours,
Et quant il est negligent,
15 Il fait et lui et son peuple indigent
Et ne lui puet le parler de ce plaire.
Verité het. Pour ce, a mon jugement, 280d
Ment donc toudis et le voir vueilles taire.
Justice avoir ne garder entreprandre
20 Est grant peril, et edifier tours,
Science aussi est au jour d’ui la mendre
Qui jadis fut es plus faillans seignours.
Non vir, n’oir vraiement
Et non parler, se l’en ne scet comment,
25 Est uns granz sens, mais qui scet argent traire
De quelque part est meilleur en mentent :
Ment donc toudis et le voir vueilles taire.
L’envoy
― Prince, Ysangrin voult de Renart aprandre,
En Ysopet, ce qu’ay voulu retraire.
30 Renart lui dist : ― Se riches te veuls rendre,
Ment [donc] toudis et le voir vueilles taire.
[1] Ms. aveugles
