Balade 693 : Un joueur fut qui tant joua (MLXI)

Autre balade

                        Un joueur fut qui tant joua
                        A .vi. quilles, au parc cornu,
                        Contre un autre qui pou rua
                        Que d’argent et d’avis fut nu.
5                      Et quant il lui est souvenu
                        Qu’il n’avoit mais ne croix ne pille,
                        Au derrain a grant gieu tenu,
                        En disant : ― A ce coup la quille !

                        Chaudement son gieu commença :
10                    Ou premier parc a abatu,
                        Mais quant vint au passer dela,
                        Son gieu lui fut moult debatu
                        Pour le grant peril qui y fu
                        De hasart, lors du baston quille
15                    Tant qu’a pou qu’il n’a tout perdu
                        En disant : ― A ce coup la quille !

                        Onques pour ce ne desista,                                                                280c
                        En derrain parc s’est embatu :
                        Ses quilles toutes y getta,
20                    Mais il n’a pas tant de verty
                        Pour le vent qui a la couru
                        Qu’il puist sçavoir comment il bille :
                        Lors rue et fiert comme esperdu,
                        En disant : ― A ce coup la quille !

                        L’envoy

25                    Princes, ne scet qui n’a sentu
                        Le gieu de Fortune et sa ville
                        Jusqu’a tant qu’il s’en sent feru
                        En disant : ― A ce coup la quille !