Balade 692 : Avant ! avant ! tiréz vous ça (MLX)
Autre balade
― Avant ! avant ! tiréz vous ça !
Je voy merveilles, ce me semble.
― Et quoy ? Guette, que vois tu las ?
― Je voy .xm. ras ensemble
5 Et mainte souris qui s’assemble
Dessus la rive de la mer
Pour nagier par dessus un tramble
Mais de paour les voy trambler.
― Certes ilz n’y passeront ja,
10 Dist uns homs qui villains ressemble,
L’un des ras m’avoine mange
Et les souris m’ont mat en l’angle.
Il n’y a pais ne triangle
Qu’ilz n’aient tout fait affamer.
15 Hardiz sont, chascuns pille ou emble :
Mais de paour les voy trambler.
― Or dy, pour quoy n’en passera 280b
Aucun d’eulx ? ― N’en vois tu l’exemple ?
Leur commun vaisseaulx vivres n’a,
20 L’yver est grant, la mer est ample
Les vens sont grief, maint se dessemble
Qui ne quiert que le retourner.
L’un d’un lez, puis de l’autre branle,
Mais de paour les voy trambler.
L’envoy
25 Princes, la guette s’escria :
― Qui les pourra faire passer,
Grant bien pour le peuple fera.
Mais de paour les voy trambler.
