Balade 691 : Le lion fist jadis son mandement (MLIX)

Autre balade

                        Le lion fist jadis son mandement
                        De cerfs, de loups, d’alans et de levriers
                        Qui furent sus asséz soudainement.
                        Et lors leur dist qu’il passast voluntiers
5                      Sur le liepart, mais trop de lymonniers
                        Qui furent la, chevaulx et mainte mule
                        Vi reculer et tenir les sentiers
                        D’escrevice, qui en alant recule.

                        Li cerfs disoit : ― Je me merveil comment
10                    L’en passera, car l’iver est trop fiers.
                        Li loups respont tresperileusement :
                        ― Courront vaisseaulx, vens sont en leurs dangiers.
                        Li alans brait : ― Ou sera no mangiers ?
                        Et li chiens dit : ― S’argent n’ay, on m’acule.
15                    L’usaige fault que je praingne premiers
                        D’escrevice, qui en alant recule.

                        L’autre bestail aloit fort murmurant,                                                280a
                        Qui requistrent vaisseauls, vivres, deniers,
                        Mais, pour leur plait, ne cheval ne jument
20                    Ne passeront ne au quart ne au tiers.
                        Le lion dist : ― Nostre fait est entiers,
                        Passe qui veult, je n’y faiz doubte nule :
                        Je passeray, sanz estre coustumiers
                        D’escrevice, qui en alant recule.

                        L’envoy

25                    Noble lyon, pourvoiéz vostre gent,
                        Vivres, vaisseauls [qu’ilz] aient sanz scrupule.
                        N’aiéz le nom, par le default d’argent,
                        D’escrevice, qui en alant recule.