Balade 699 : Dont venéz vous ? Ou fustes vous er soir (MLXVII)

Autre balade

                        Dont venéz vous ? Ou fustes vous er soir ?
                        ― Et tu ? Dont viens a ceste matinee ?
                        ― Que t’en est il ? ― Il le me fault sçavoir.
                        ― Je ne finay hier toute la journee.
5                      ― De quoy faire ? ― D’avoir une espousee.
                        Bon sain portoit, gros con et grosses fesses.
                        .xiiii. fois lui bati sa pouppee,
                        Tant qu’elle dist : ― Fuy de cy, tu me blesces.

                        ― Pandus soit il qui n’en dira le voir !
10                    ― Ainsi soit il. ― Ou fut elle trouvee ?
                        ― En un marchié, sur le tart qu’il fist noir,
                        Et quant je l’os en ma chambre admenee
                        Ou il n’avoit fors nous .ii. ame nee,
                        Jus la gettay, mais ses cons avoit tresces :
15                    Esbahis fu, par la l’ay atrappee
                        Tant qu’elle dist : ― Fuy de cy, tu me blesces.                                  282a

                        Adonc me mis en [ce] point de sçavoir
                        Qui tel hure lui avoit eslevee :
                        Elle me dist que la guise pour voir
20                    De faire ainsis estoit en la contree,
                        Et que sanz poil seroit trop diffamee.
                        Par entre deux me mis lors es adresces.
                        De moy fut bien celle nuit tabouree
                        Tant qu’elle dist : ― Fuy de cy, tu me blesces.