Balade 689 : En un pais plain de soulas (MLVII)
Autre Balade
En un pais plain de soulas 279b
Dont Jeunesce tenoit la voye,
Vy chevauchier le petit pas
Esperance, Leesce et Joye
5 Qui cuident que nulz ne les voyz.
La avoit pastours et tropeaulx
De jeusnes brebis et d’aingneaulx,
Mais je regarday entre deux
Un qui crioit aux pastoureaulx :
10 ― Gardéz vos brebis pour les leux.
La venoient, selon le bas,
Ainsi comme pour prandre proye
Priere, Faintise et Baras,
Volunté tuit a sa courroye,
15 Et chascun d’eulx, en las de soye,
Trois renars et .iiii. louveaulx
Pour descoupler, crians a eaulx.
La prindrent .vi. brebis entr’eulx.
Je ne sçay qu’ilz firent des peaulx :
20 Gardéz bos brevis pour les leux.
Ils mistrent en divers estas
Leur forme et leur pel toutesvoie.
― Adviséz y pour les debas,
Dist Dangier, garder ne sçaroie
25 Des loups privéz si jeusne proie.
Qui boutent leurs piéz es aigneaulx
Ne de ces jeusnes renardiaulx
Qui cheminent par nuit tous seulx.
Pour Dieu, de ces chaceurs nouveaulx
30 Gardéz voz brebis pour les leux.
L’envoy
Pastours, je vous conseilleroie, 297c
Afin que beste ne desvoie,
D’estre jour et nuit bien prés d’eulx.
Sanz garde aler ne les lairoie
35 Pour telz chaceurs dont je marvoie.
Gardéz vos brebis pour les leux.
