Balade 688 : Malade suy, dist le chief a son corps (MLVI)

Balade 

                       ― Malade suy, dist le chief a son corps,
                        Tant que ne sçay que je devenir doye.
                        ― C’est a bon droit, vous avéz bouté hors
                        Les droiz membres dont je vous soustenoie.
5                      D’estranges mains aidier ne vous pourroye,
                        Ce dist le corps, car vous m’avéz osté
                        Jambes et bras et le destre costé
                        Et m’avéz joint membres d’autre paraige
                        Qui m’ont destruit et a vous la santé.
10                    ― Corps, doulz amis, dy moy donc que feray ge ?

                        ― Je le diray pour vous estre ressors.                                                279a
                        Se je di voir, pour Dieu, ne vous anoye :
                        Estranges piéz sont comme chiens et pors
                        Qui ne servent fort de happer leur proye,
15                    Les mains aussi, pour quoy le celeroie ?
                        Ce qu’ilz happent est ou fiens bouté,
                        S’en est le corps et le chief affolé,
                        Ne jamais jour ne feront vasselaige,
                        Fors que ventre est et le chief desolé.
20                    ― Cors, doulz amis, dy moy donc que ferai ge ?

                        ― Vous delairéz ces membres vilz et ors,
                        Et me lairéz les membres que j’avoye
                        Naturelment, c’est vostre drois tresors,
                        Conjoins avous et a dueil et a joye.
25                    Ne vous faurront ne que je vous faurroye,
                        C’est vostre sang conjoint en unité,
                        Partans au bien et a la maleurté[1],
                        Car au chief sont les membres de linaige.
                        Ouvréz par eulx ou vous seréz gasté.
30                    ― Corps, doulz amis, dy moy donc que ferai ge ?

                        L’envoy

                        ― Chief, je conclu aliance, amisté,
                        A voz membres, et que l’extremité
                        D’autres boyaulx ne changent vo couraige.
                        Ainsis seréz garis et respassé,
35                    Autrement non. ― Ce dolent mot cessé,
                        Corps, doulz amis, dy moy donc que ferai ge ?

[1] Ms. maleureté