Balade 687 : Tristes, pensis et merancolieus (MLIII)

Autre Balade

                        Tristes, pensis et merancolieus,
                        Dolens de cuer, et mornes a toute heure,
                        Sanz avoir bien, suis des maulx amoureux
                        Et de penser, qui toudis me court seure.
5                      Desir m’assault, Souvenir me deveure
                        Quant le grant bien de ma dame perçoy
                        Et sa bonté, qui avec moy demeure.
                        Las ! et de lui si eslongié me voy

                        Qu’en tous lieux suis du depart dolereux,
10                    Ne rien ne puis avoir qui me sequeure
                        Fors Doulz Espoir : cilz me garde tous seulx.
                        Mais je craim trop pour ma longue demeure
                        Qu’Entroublier a ma dame n’aqueure
                        Et qu’en son cuer ne mette autre que moy
15                    Qui en fut[1] pres en tout bien, ce m’espleure :
                        Las ! et de li si eslongié me voy !

                        Or li suppli qu’elle ait le cuer piteux
                        Et que le mien qui est plus noir qui meure                                      278b
                        Vueille asseurer, si le fera joieux
20                    Et mon las corps qui plaint, souspire et pleure,
                        Aura confort, ou il faut qu’il dequeure,
                        Martirs d’amours, en l’amoureuse loy
                        Du doulx conjoy fi liéz, mais ce m’aqueure :
                        Las ! et de li si eslongié me voy !

[1] Saint Hilaire corrige en fu