Balade 686 : Je voy d’amours requerir largement (MLI)

Autre Balade

                        Je voy d’amours requerir largement                                                  277c
                        A mains amans qui ne l’ont desservi,
                        Et a autres voy cueillir le froument
                        Qu’ilz n’ont semé, labouré ne nourri,
5                      Et j’ay tous temps, dont j’ay le cuer marri,
                        Ma dame amé sanz esperer secours,
                        Et faiz encor. Or ait de moy mercy :
                        Ja[1] ne requier fors la paille d’amours.

                        Et si ay je traveillié longuement
10                    Et labouré depuis que je la vi
                        Mainte saison a son commandement,
                        Et en tous cas gardé son honneur, si
                        Que je ne craing ami ne ennemi
                        D’avoir parlé ne riens fait arrebours.
15                    S’a grant pechié, quant pitié n’a de mi :
                        Je ne requier fors la paille d’amours.

                        Savéz que c’est ? A mon entendement,
                        Un doulz baisier qui tost est defeni
                        Et qui s’en va asséz legierement
20                    Et n’y pert point, si tost qu’il est failli.
                        Comme paille s’est tost esvannouy.
                        On ne puet moins avoir de ses labours.
                        Le grain vault mieux, or me souffist ainsi :
                        Je ne requier fors la paille d’amours.

                        L’envoy

25                    Princes, dont puet venir le mouvement
                        Que cellui jouit qui n’a paine ne plours,
                        Et je languis. Auray je alegement ?
                        Je ne requier fors la paille d’amours.

[1] Saint Hilaire corrige en Je