Balade 685 : Le departir et la longue demeure (ML)

Autre Balade

                        Le departir et la longue demeure
                        Et le desir que j’ay de retourner
                        Font de tourment mon cuer plus noir que meure,
                        Ne je ne puis nulle part sejourner
5                      Que je n’aye deléz moy doulz penser
                        Et souvenir qui me bruit a l’oreille,
                        Ramentevant vo doulz viaire cler,
                        Chiere dame qui n’avéz vo pareille.

                        Et lors mon cuer se plaint, gemit et pleure,
10                    Quant il ne puet deléz vous demourer.
                        Las ! qu’ay je dit ? Mais tous temps y demeure
                        Si qu’il n’en puet partir ne dessevrer.
                        Le corps est loing, mais le cuer sanz cesser
                        Est deléz vous, qui a vo bonté veille.
15                    Or le vueilliéz com le vostre garder,
                        Chiere dame qui n’avéz vo pareille.

                        Quant me souvient de la douçour et l’eure
                        Du departir, lors me fault endurer
                        Toute doulour qui au cuer me court seure.
20                    Et se ne fust le tresdoulz esperer
                        Que j’ay en vous, je ne peusse durer.
                        Car ma langour est sur tous despareille :
                        Pour long demour ne vous vueilliéz muer,
                        Chiere dame qui n’avéz vo pareille.