Balade 684 : Plant de vigne tresrenommee (MXLIX)

Autre Balade

                        Plant de vigne tresrenommee
                        Qui tant de bon vin porté a
                        Dont la liqueur est tant amee
                        Qu’a tousjours parlé en sera,
5                      Honnis soit qui vous deffera
                        Car vous estes de bon raison
                        Cueillus vert, ce vous aidera :
                        Muéz vostre verdeur en vin.

                        Car je voy que verde vinee
10                    Sanz viner pou proufitera
                        A cellui qui a labouree
                        La vigne, et pour ce ne pourra
                        Le labour, quant il devera,
                        Valoir a soy n’a son voisin.
15                    Die donc qui vous aymera :
                        Muéz vostre verdour[1] en vin.

                        N’attendéz pas la tierce annee,
                        Lors vostre proufis se fera.
                        Soiéz meur, soit verdure ostee
20                    Et chascuns vous achatera.
                        Vostre vinee vous vauldra,
                        De vo vigne naistra l’or fin,
                        Autrement non. Or y parra :
                        Muéz vostre verdeur en vin.

                        L’envoy

25                    Prince, despeuille vert couppee
                        Ne puet tant valoir en la fin
                        Com la meure bien ordonnee :                                                           277b
                        Muéz vostre verdeur en vin.

[1] Saint Hilaire corrige en verdeur