Balade 666bis : On dit qu’il fait bon avoir compaignie (MXLVIII)
Autre Balade[1]
On dit qu’il fait bon avoir compaignie, 276d
Mais en mains cas s’en pass’on de legier.
Uns glouz la fuit quant il a glotonnie,
Tous seuls vouldroit sa viande mangier.
5 Homs ne grace vouldroit autre estrangier,
Sanz compaignon estre, et demourer seulx.
Compaignie vouldroit bien uns tigneux,
Et homs blasméz, pour un qu’ilz fussent troy.
Ne sçay comment gent dorment .ii. et deux :
10 En tous temps fait bon couchier a par soy.
Prouver le puis par maint qui se marie.
Quant il fait chaut, et il sent le dangier
De femme avoir qui le suente et tarie,
Ou s’il fait froit qui le veult approuchier.
15 Lors le convient queudre, poindre et brochier
En cuirien, et restouper les treux,
Ou il orra maint mot suspeçonneux.
Adonc voulsist plus estre seul que doy.
Lors de certain di sanz estre doubteux :
20 En tous temps fait bon couchier a par soy.
Tenéz vous donc que ce soit bonne vie,
De .ii. et.ii. communement couchier ?
L’un veult couvrir, l’autre ne le veult mie,
Si ne se puet ne l’un ne l’autre aisier.
25 L’un veult dormir, l’autre veult divisier[2].
Contraires sont, descouvers et fruilleux,
La rongne en vient, la tous, boces et cloux[3].
Si vault trop mieux chascun en son recoy
Dormir a part, pour le moins perilleux :
30 En tous temps fait bon couchier a par soy.
L’envoy
Prince, moult fault sçavoir de l’escremie,
A couchier deux, soit ami ou amie,
Car trop de plais et de dangiers y voy. 277a
Robe tirer tout nuit anuitié,
35 Sanz reposer : pour ce, quoy que nul die,
En tous temps fait bon couchier a par soy.
[1] Pièce identique au f° 271 sous le n° MXXVIII
[2] Saint Hilaire corrige en devisier
[3] Saint Hilaire corrige en cleux
