Balade 683 : J’ay .viii. mois l’an ordonnéz pour servir (MXLVII)

Autre Balade

                        J’ay .viii. mois l’an ordonnéz pour servir,                                          276c
                        Et .viii. seigneurs que je vous nommeray :
                        Les mois premiers esquelz je doy venir,
                        Janvier, fevrier, mars, apvril, juing et may,
5                      Novembre aussy et decembre prandeay.
                        Janvier au roy, decembre pour Bourgogne,
                        May a Valois, mars, Navarre ap[le]gay :
                        Les autres mois vueil faire ma besongne.

                        A Nevers fault moy en novembre offrir.
10                    Philipe, en juing, le Barroys serviray.
                        Charle en fevrier m’a voulu retenir,
                        Et en avril o les dames seray ?
                        Ainsi mes mois d’ordre en ordre suiray
                        Sur messeigneurs cui Dieux grant vie doingne,
15                    Joieusement o eulx me deduiray :
                        Les autres mois vueil faire ma besoingne.

                        C’est en Jullet qu’om doit ces prez cueillir,
                        Et en aoust ses blez, car bien le sçay,
                        Et engrangier, qui veult estat tenir,
20                    Septembre, octobre, adonc vendengeray.
                        Pour l’an entier ainsi me garniray,
                        Car qui riens n’a, on le fuit et ressoingne.
                        Ce fait, mes .viii. mois servir m’en riray.
                        Les autres mois vueil faire ma besoingne.

                        L’envoy

25                    Prince, a court sont maint que nommer ne sçaay
                        A qui labeurs en fait guieres d’essoingnes.
                        Huit mois et plus, mais pas tant n’y seray :
                        Les autres mois vueil faire ma besoingne.