Balade 682 : Je, Sebille, de Dieu vivant prophete (MXLVI)

Autre Balade

                        Je, Sebille, de Dieu vivant prophete,
                        Faiz asçavoir que du regne adoptif,
                        Par son orgueil, sera vengence fette
                        Ou temps que tuit seront vindicatif
5                      Sanz craindre Dieu, et trop judicatif
                        En volunté de raison dessevree,
                        Bouche parlant, ou cuer autre pensee,
                        Baras couvers, le sang humain mangier
                        Perseverans, amour dissimulee,
10                    Et lors doivent monarchies changier.

                        En cellui temps naistra la fole secte,
                        La panthere, le loup simulatif,
                        Le cerf volant, l’ourse, la tigre brette
                        Et le cengler. Entr’eulx ara estrif
15                    Tant que l’un d’eulx, par un mauvais motif,
                        Prins et lié sera en sa contree.
                        De son sang puis espandra la ventr’e.
                        Sus se courront pour leurs meffaiz vengier
                        En Occidant par glaive et par espee :
20                    Et lors doivent monarchies changier.

                        La calendre sera en deux lieux fraite
                        Et remaindra par tout pollu son nif,
                        Son chant donné yert vendu et en debte,
                        Ne plus n’ara fors que le vocatif,
25                    Et des corbeaulx le nombre pluratif
                        O les choes alors habandonnees
                        Seront destruiz et ces choes plumees.
                        Les grans renars fera l’en escorchier
                        Pour leurs deliz, c’est vengence ordonnee.
30                    Et lors doivent monarchies changier.