Balade 681 : Plouréz, plouréz, peuples de Pharaon (MXLV)
Autre Balade
Plouréz, plouréz, peuples de Pharaon, 276a
Et vostre roy sa misere larmoye,
Qui aux Hebrieux ne voult faire pardon,
Dont Moyses lui enseignoit la voye.
5 Trop endurci, pour ses pechiéz se noye,
De dix plaies en Egipte feru.
La Rouge Mer leur a vie tollu,
Perseverans en leur rigour mauvaise
D’espendre sang, la sont mort et perdu :
10 Prions a Dieu que vers nous se rapaise !
O Baltasar, de toy que recite on,
Tresconvoiteux sur or et sur agent ?
Babiloine, dont rois portas le nom,
La grant cité prinst sur toy toute voie
15 Li roys Cyrus et te soumist en proye,
En delivrant le peuple qui la fu
Emprinsonnéz, et mis soubz ton escu.
Jherusalem fut par toy a mesaise.
Ayons paour d’estre brief confondu :
20 Prions a Dieu que vers nous se rapaise !
Las ! que devint Choré et Dabyron ?
Transgloti sont, terre les absorboye.
Nynive fault, et Romme en Rubicon
Ou Cesar lors par fortune sa voye
25 Oultrepassa. Or est destruite, et Troye.
Pour leurs delis sont en cendre et en fu,
Et qui verroit comment on a vescu
Puis .lx. ans, jamais ne seroit aise,
Car en nous n’a charité ne vertu :
30 Prions a Dieu que vers nousse rapaise !
L’envoy
Prince, penséz de faire vo salu,
Li peuple aussi, li grant et li menu,
Car li feux est ja mis en la fournaise
Pour tout ardoir. Nous sommes tuit perdu 276b
35 Pour noz meffaiz, aux infernaulx rendu :
Prions a Dieu que vers nousse rapaise !
