Balade 680 : Vous qui vouléz le monde chastier (MXLIV)

Autre Balade

                        Vous qui vouléz le monde chastier
                        Et qui monstréz les vices qu’on y fait,
                        Faictes a droit, chastiéz vous premier,
                        Ne vous chaille ja de l’autruy meffait,
5                      Car un chascun est chargié de son fait.                                            275d
                        D’autrui meffait n’est vengence en vous prinse[1]
                        Selon la loy. Riens n’y vault vostre brait :
                        Car un chascun fait du sien a sa guise.

                        S’aucun se veult vers Dieu humilier,
10                    Faire le doit. Se li autres meffait,
                        L’umiliant ne puet en riens lier.
                        Il ne vient pas a chascun a son hait.
                        A chascun fault, quelque meschief qu’il ait,
                        Prandre et soufrir bien ou mal son emprinse
15                    Et cheminer [ou] par bel ou par lait,
                        Car un chascun fait du sien a sa guise.

                        Li uns se fait par folie escrier,
                        Li autres non. Li uns a trop de plait,
                        L’autre se fait congnoistre a maugrier,
20                    L’un se congnoist et l’autre se deffait,
                        L’un pert le sien et l’autre se refait
                        Selon son sens et raison qui l’advise.
                        L’un fait a droit, l’autre se contrefait,
                        Car un chascun fait du sien a sa guise.

                        L’envoy

25                    Princes, pou vault le cocart enseignier,
                        Ne faire au foul de sens longue divise,
                        Ne le felon trop longuement prier,
                        Car un chascun fait du sien a sa guise.

[1] Ms. en vous vengence prinse