Balade 679 : Quant je parti de vostre grant douçour (MXLIII)

Balade

                        Quant je parti de vostre grant douçour,
                        Belle et bonne, plaisant et vertueuse,
                        Que je desir et aime sanz sejour
                        Com la meillour et la plus gracieuse
5                      Qui soit vivant, puis n’oy vie joieuse,
                        Ne je ne puis vivre joieusement
                        Quant me souvient du doulz departement.

                        La vigile de la Vierge d’onnour,
                        C’est la mi aoust, feste tresglorieuse,
10                    Que vers vous fu ma tresloiale amour,
                        Et vous trovay humble, douce et piteuse
                        En tout honour. Vo douçour doulcereuse
                        Me fait avoir maint divers pensement
                        Quant me souvient du doulz departement.

15                    Or vous suppli, tresdouce et humble flour,
                        Que ne soiéz envers moy rigoreuse
                        Pour le depart qui me met en tristour,
                        Doubtans l’oublie de vous, tresamoureuse.
                        Car quant a moy, ne soiéz desdaingneuse,
20                    Que vostres suis, mais j’ay trop de tourment
                        Quant me souvient du doulz departement.