Balade 678 : Je croy que j’ay pour faire ce voyage (MXLII)

Balade

                        Je croy que j’ay pour faire ce voyage
                        .iiii. varléz, ruséz et bien aprins,
                        Car sur les champs ne vont point en fourrage.
                        Ilz me veulent mener en paradis :
5                      Qu’a leur pouoir me logeront toudis
                        En lieu seur, chastel ou bonne ville.
                        La comptent hault, et ne leur chault du pris,
                        Tant qu’il ne m’est demouré croix ne pille.

                        Et quant je fi que ce n’est pas l’usaige
10                    Et qu’ilz deussent logier en plat pais
                        Pour moins fraier, pour avoir l’avantaige
                        D’avoine et foing, buefs, vaches et brebis,
                        Et pour partir sanz compter du logis,
                        Ilz respondent : ― Chose seroit trop vile.
15                    Tousjours s’en vont logier ou il a lis,
                        Tant qu’il ne m’est demouré croix ne pille.

                        En moy monstrant par gracieus langaige
                        Que d’estre au plat, les corps en valent pis
                        Et les chevaulx, œufs n’y a ne frommage[1],
20                    Tout est retrait, et s’en est on reprins,
                        Pillars tenuz, et pour ce m’ont aprins
                        Que je seray prodoms entre cent mille
                        D’ainsi logier : a Bapaume m’ont mis
                        Tant qu’il ne m’est demouré croix ne pile[2].

                        L’envoy

25                    Princes, je suis desja tous esbahis                                                    275c
                        De mon argent. Tout s’en va qui ne pille.
                        Chevaux et gens m’ont rungie jusqu’au pis
                        Tant qu’il ne m’est demouré croix ne pille.

[1] Saint Hilaire corrige en frommaige

[2] Saint Hilaire corrige en pille