Balade 677 : Mon cuer, mon bien, mon soulaz et ma joie (MXL)

Autre Balade

                        Mon cuer, mon bien, mon soulaz et ma joie,
                        Mon vray desir et toute m’esperance,
                        Ma douce amour ou je me delectoie,
                        Tout mon confort, toute ma souffisance
5                      Se part de moy, mon honour, ma puissance,
                        Et si ne sçay quant je le reverray.
                        De son retour suy en trop grant doubtance :
                        S’il ne revient, a tousjours languiray.

                        Las ! qui li fait emprandre tele voye ?
10                    Certes, Pitéz, Honeur, Force etVaillance,
                        Jonesse aussi qui a tous biens l’avoye,
                        Et hardement qui le met en balance
                        De mer passer, et n’a la congnoissance
                        De son retour neant plus que je l’ay.
15                    Ce me destruit, car je l’aim des s’enfance :
                        S’il ne revient, a tousjours languiray.

                        Or vueille Dieux que brief s’en reviengne
                        A son honnour et a la delivrance
                        De ses subgiéz, et le bon temps ravoye
20                    Qui fut jadis ou royaume de France,                                                  274c
                        Tant que plus n’ait son peuple tel souffrance,
                        Mais soit par lui gettéz de son esmay :
                        En dieu en est, mais je pers ma plaisance,
                        S’il ne revient, a tousjours languiray.