Balade 421bis : Regart me trait et Doulz Pensers me rue (MXXXIX)

Balade[1]

                        Regart me trait et Doulz Pensers me rue,
                        Desirs m’assault et Souvenirs me nuit,
                        Et la beauté de ma dame m’argue,
                        Paour me tient et de jour et de nuit,
5                      Honte me vient et Dangier me destruit.
                        Se Pitiéz n’est, je mourray d’amer cy,
                        Et Doulz Espoir qui un po me conduit.
                        Je n’attens riens fors que mort ou mercy.

                        Helas ! Amours m’a bien mis en sa mue
10                    Quant je ne puis voler, n’avoir deduit,
                        Ne veoir l’air de la tresbelle nue
                        Qui de beauté com le souleil reluit.
                        Car Male Bouche a mon oreille bruit,
                        Qui, nuit et jour, me met en grant soussy.                                       274b
15                    Desespoir vient et ceuls me grevent tuit.
                        Je n’attens riens fors que mort ou mercy.

                        Douce Pité, qu’estes vous devenue ?
                        Franchise aussi, Grace qui tousjours luit,
                        Plaisant Desir, soiéz a ma venue.
20                    Faittes qu’octroy soit pour vo bonté duit,
                        Se grace n’ay, que j’aye sauf conduit
                        Pour regarder celle que j’ayme sy.
                        Et s’ainsi n’est, mon corps art tous et cuit :
                        Je n’attens rien forsque mort ou mercy.

[1] Pièce identique au f° 169 sous le n° DXXXIV