Balade 676 : Tressaint Pere, Gillet supplie (MXXXVIII)

Autre Balade

                        Tressaint Pere, Gillet supplie
                        Des Champs a vostre saincteté,
                        Qui a Orliens estudie,
                        Que de vostre benignité
5                      Chanonnie ait ou dignité
                        A Chaalons, Laons ou a Paris,
                        Rains ou Rouen, et soit escrips
                        Prenans, ce vous supplie Eustace.
                        Or ne soit de vous escondis :
10                    Vueilléz lui faire vostre grace.

                        .VI. ans a en phillosophie
                        A Paris en la rue esté,
                        Cler engin a, bien versifie.
                        A l’Eglise l’a presenté
15                    Le dit Eustace. N’est renté
                        Ne benefice n’a acquis
                        Le dit Gillet, qui est ses filz.                                                               274a
                        Si fault que quelque bien lui face
                        Vostre saincté. Peres chieris,
20                    Vueilléz luy faire vostre grace,

                        Tant qu’il puist poursuir clergie
                        Ou jusqu’a cy a proufité,
                        Et qu’il puist en theologie
                        Par vo moien estre exité.
25                    Il tent a estre habilité
                        In utroque. Encor servis
                        Seréz de lui. Et, se je vis,
                        Je vous yray veoir en face.
                        Pere saint, octroyéz mes dis,
30                    Vueilléz lui faire vostre grace.

                        L’envoy

                        Tresaint pere, n’oubliéz mie
                        Gillet mon filz, qu’il n’ait sa place
                        D’obtenir quelque chanonnie.
                        Vueilléz lui faire vostre grace.